نلعب كلام .. مصطفى الجارحي

مصطفى الجارحي

 

فيه وجود وفيه عدم

فيه أَيس ولَيس..

وفيه تجلِّي للمطر يتسمَّى غيث

حتى الأسد

اسمه غضنفر قسورة وسبع ليث

والجدي تيس

والتاء من التأنيث

قريت لـ«جويس» رواية اسمها «عوليس»

ربّك طرد من جنّته آدم مع إبليس

والجمهورية بترفض التوريث

ملكة سبأ كان اسمها بلقيس

ولبنى لعبت دور هاميس

شادية اللي كانت فؤادة ما خافتش من عتريس

مين اللي قال المشاعر كلّها أحاسيس

دي المانجة فَص وهندي فونس وفيه تيمور عويس

والحاكم الوالي رئيس.. محشور في كيس

الندل مربوط بالخسيس

والنُبل من شيم الحسيس

ودي ريحة القسيس

على غنوة للتهييس

وده عُشب للتخسيس

جبلاية للنسانيس

رمضان يهل فتكتر الفوانيس

وبيبان بيوتنا تخاصم الترابيس

لاسكندرية ظهير ريفي قالوا إنه أبيس

طبعًا ده غير عجل الفراعنة أبيس

و«نِيس» مدينة فرنساوية عندي أشهر من باريس

وعشان نشاور ع الأمل بنقول بصيص.. في ليل غطيس

الأربعاء والجمعة بيحاصروا الخميس

والشرطة تتفرنج بوليس

اللعب في الكواليس

وفيه عروسة وفيه عريس

وجليسة بتنادي الجليس

وكبيسة مفردها كبيس

جمع الكابوس مش الكوابس.. إنما الكوابيس

في المدرسة تدريس

في الهندسة تهنديس

والرك ع التأسيس

وآب وابن وروح قدس في عقيدة التثليث

مجموعة بالتخصيص لكنها قصاقيص

فيه ناس تقول: زلطًا وملطًا.. وناس تقول بلابيص

وناس تقول ع الزلع بلاليص

فزقطط وهيص

جمّال زمان كان اسمه حادي العيس

تركي بجم وكان يقول خرسيس.. أدب سيس

«فوكو» اكتشف رقّاص للساعة مش ترقيص

في الفازة وردة بتدبل ووردتين بيفتّحوا في أصيص

وعقلة الإصبع كان عندنا فـ حدوتة واسمه نُص نُصيص

غمِّي عنيك سمّعني صوت خلاويص!

* من كتاب (تمارين يومية للكتابة).

شاهد أيضاً

ديمة محمود

هذا الطائر .. ديمة محمود

  رَفّ رفتين أو ثلاثًا قَطفةٌ لِعنقودين ثمّ حطَّ رِمشٌ ينضجُ زهرةَ ماء تتدحرجُ ضحكةٌ …

اترك رد

error: المحتوى محمي بموجب قوانين حماية الملكية الفكرية