لفظ خارج .. سيد أبو ليلة

سيد أبو ليلة

 

١٠ أكتوبر ألفين وحاجات:

مش فاكر جيت الدنيا ازاي

مين بدّل رِق القلب بناي؟

صبّلّي الواد كوباية الشاي

ولقيتني ببص على الساعة

 

ولاعة وقادت في سيجارتي

وبعدّ فلوسي وأحزاني

أضحك وافتكر إني لوحدي

ومافيش مخلوق استناني

 

«مش عايز منديل يا حبيبتي»

رديت ع الطفلة فـ كرهتني

مناديلك ها تزوّد همي

لما اطلب دمع وما اعرفشي

 

أشكي لكم ولا ها اكون شحات؟

أحكي لكم ولا أزغزغكم؟

البنت شافتني بخاف م الموت

فسابت لي الدنيا كفن بيضيق

 

أمي ما حكتليش حدوتة

ولا فاكر حجرها ولا صوتها

بتشد هدومي وبتعيط

وأنا بهرب علشان ألاقيها

 

خايف م الناس.. والخوف مرضي

خايف م الوحدة فبطلبهم

خايف م الدنيا لـ تسرقني

خايف م الآخرة تكون عميا

 

بكدب وبصدق وبزايد

بلبس في اليوم 100 شخصية

واحلم بالتسقيف والجمهور

وببنت تآمن بالكواليس

 

بكسر أوزان التفعيلة

علشان أكسر قلبك زيي

بكسر قافية كل الشعرا

علشان الكسر القافية الحق

 

جربت فـ مرة تخون نفسك

فـ ما تعرفش تحبها تاني

جربت تكسر أعضاءك

وتدور ع الوجع الأصدق

 

جربت توريهم شكلك

في مجاز فاقد كل الأركان

جربت تراهن ع الخسران

عشان تكسب صاحب إنسان

 

مش ها انهي قصيدتي ولا ها اخليك

توصل للمتعة اللي فـ بالك

محروق الشاعر لو فضّل

أفراح الناس على أفراحه

شاهد أيضاً

شريف عابدين

بأقل قدر من وهج  .. شريف عابدين

  تألقي.. بأقل قدر من وهج يتأجج في هدوئه المعتق منذ استرسال كاليستو كقمر رابع …

اترك رد

error: المحتوى محمي بموجب قوانين حماية الملكية الفكرية