لحد ما ترسي العايمة .. عبده الشنهوري

عبده الشنهوري

طول عمرك

اللي فــ إيدِك

مش ليك

دايمًا شايف

خلف سواد الغيمة

ضي القمرة

وصابر

لحد مـا ترسي العايمة

فوق البر

مش دايمـًا تفاسيرك

صايبة

مش قُلت لي

عشق تراب الأرض

ماهوش ورطة؟

وكل ما آجي أدفن حلم

بتوقِفني

مش نفس الأوراق الصفرا

تحت شجرنا

كانت خضرا فــ شهر مضى؟!

لسَّاك بتشوف أبواب لشروقك

حايمة عليها بيارق؟!

طول عمرك منتمي للأرض

وفــ نن عينيك

طرقات ودروب

حواليها خَضار

ترشق فـ سكونها صهيل

يتحول حزن الأرض العاقرة

لفرْح مزهزه

أنا عمري ماشُفتك

جايع ولا عطشان

غير جوعَك للسَتر

ورضا الرحمن

قبل النوم

تغسِل وشَّك

من عَفَر اليوم

وتنام

طول عمري

ضد الشرط المقلِق

تقلقني المَيَّة الساكنة

ومايسندنيش

غير حيطي اللي بنيتُه

إن مُت بليل

خلُّوني لحد ما اودَّع

ضَي الشمس

طول عمري

مقضِّي العمر سفَر

وانا خايف مـَرَّة أروْح

ما ارجعش

طول عمري مُدرِك

إن الليل مابدأش الليلة

وما بين حلمي ومقدرتي

تظهر مشكلتي

أدفع فـ ضريبة الملح

وكتير بيفوت

وآديك شايف

الدنيا مصاحبة الهلفوت

وانا عامل زي النهر النازل

جـوَّه محيط

مش قُلت

عشان النجم يزهـّر

لازم يسهـَر؟!

مش برضـُه

قضّينا العُمر

سهر وسفر؟!

وتمللي بنشوف

من ورا شباك الدنيا

كتير وكتير

أشياء مالهاش تفسير

والوقت يدور

والدنيا اللي بترقص

علي قـَرن التور

توازنها يختل

بيتك فوق التل

وبيتي تحت جبل

ضهري وضهرك محنيين

زي علامتين استفهام

ولازلنا

بنضحك وقت شروق الشمس

ونحزن

وقت غروبها

شاهد أيضاً

غادة عزيز

من تكون .. غادة عزيز

  حين يستبدُّ بك التكرارُ وتمتطي الأرضَ قشعريرةً لا تطأ حدودَ الماءِ منْ تكونُ لاشتهاءِ …

اترك رد

error: المحتوى محمي بموجب قوانين حماية الملكية الفكرية