علاقات حميمة .. أمينة عبد الله

أمينة عبد الله

 

إنتَ بطبيعتك شخص منفتح

بتقدر تعبر عن أشياءك بدقة متناهية

وبدون خوف من الصدامات المجتمعيه.

وبرجك متوافق تمامًا مع طبيعتك

وبيسمح لك

بشىء من التحايل ع الآخرين

وخلق كائنات تساعدك على حوار مفتوح بينك وبين نفسك

وهنا

مشكلتك الحقيقية مع نفسك

لأنك خايف من فكرة التناقض

وإن صورتك ما تتطبقش على بعضها

بس دى

مش أزمتك لوحدك

دى أزمة كل اللى بيفكروا ف ربنا بالشكل ده

ومحاولوش يوجدوا علاقة مش مربوطة

لا بخوف الديانات السماوية

ولا بحب الديانات الأرضية

***

بين الحب والخوف

إنتَ مطحون بعلاقات مش حميم

كلها شبه العلاقة بين الطوق والإسورة

وكلها أشكال للهروب

من ضغوط ف دماغك لوحدك

لأنك ما حاولتش تجرّد الفكرة

وتربط بين ضغوطك وأفكارك

وبين الضغوط والأفكار العامة

فلبست الإسورة مكان الطوق

***

 عامل لنفسك مجرة

وعالم فلكي ماسك فيه بنجم وحيد

لأنك عارفه

خايف؟

أنا عارفة إنك خايف على عكس شجاعتك المفتعلة

وعارفة إن استسلامك لحضني

وبكاك في حضني

هو معادلك الموضوعي للأمان

لكنك

ح تفضل تدور ف مجرتك

خايف

وحيد

من غير كائناتي.

شاهد أيضاً

نزف .. سيف الخفاجي

  مرهقة جدًا حالة النزف أكتب بلا توقف صداع رهيب بنٌ يعجز عن كبح جماحي …

اترك رد

error: المحتوى محمي بموجب قوانين حماية الملكية الفكرية