شيش موارب.. ناجي شعيب

ناجي شعيب

شباك في قلب أمي عمره ما يوم اتقفل

ببص منه ع الغيطان وسكة الزراعية

وبنّط منه على جنينة البرتقان

اللي مزروعة فـ قلب ابويا

كنت دايما بقيّل فـ ضلها

ساعة لما اكون نفسي مكروش

أو فيه حاجه مزعلاني م الدنيا

ولما اصحى اقوم وانا فايق

أشرب واطس وشي بشوية ميّه

من صينية القلل اللي ميتّها بمورد

وانشف عرقي بنسمة الهوى الحنيّنه

اللي داخلة من ورا الشيش

مع نفس أمى إللي داخل سدرها

 

– ياخبتك

راجع تدور دلوقتي على شباك قديم

وماعدش حيلتك في العمر

غير الرايح

 

شباك في قلب أمي

مصنوع من خشب روحها

ومدهون بضي طلة أبويا

ومتزوق بقفص كناريا

بتتربى فـ نعمة عزهم

ومتعلق على حوافيه من جوه

براويز صور لأخواتي إللي ماتوا

ومناديل فرح اختي الكبيرة

وزغاريط الجيران يوم طهوري

وضحكة حبيبتي أيام المدرسة

وصوت دموعي وهيّه بتعزل

دايما هواه بيتجدد وريحته حلوه

متعطر بريحة العشرة

لما افتح الشيش بتنفس حنين

وبحضن الدفا اللي بيملى سدري

 

ــ ساعة ما ولعناه كنت بتنكوي

من حضن تاني ومش محتاج

تدفي ايديك

 

شباك فـ قلب أمي

كنت بتونس بيه وبتسامر معاه

واقعد اتحدت للصبح انا وروحي

أيام ماكان لسه فيّه الروح

وبتسقيني من ضيها بلسم جروحي

أبص منه واتعاجب على الدنيا

إللي مش سيعاني ولا قد خطوتي

صحيت فـ مره من وسط غيبوبتي

لقيت الموت بيقفل فـ وشي الشيش

عرفت وقتيها أنا قد إيه

كنت عيّل خايب!

شاهد أيضاً

ميثم راضي

النشيد الوطني .. ميثم راضي

  هولاء الأولاد ماتوا جيدًا.. ماتوا بكل قوتهم وسيستمرون هكذا.. موتى للأبد حتى عندما تأتي …

اترك رد

error: المحتوى محمي بموجب قوانين حماية الملكية الفكرية