جواب في الشنطة .. شيماء الصباغ

شيماء الصباغ

مش عارفة..

هيَّ صحيح مش أكتر من شنطة

بس لما ضاعت كان فيه مشكلة

إزاي أواجه العالم من غيرها

خصوصًا

والشوارع حافظانا سوا

المحلات عارفاها أكتر مني

إكمن هيَّ اللي بتحاسب

عارفة ريحة عرقي وحابّاها

عارفة المواصلات

وعاملة علاقة مع السواقين

حافظة الأجرة

ودايمًا جراب للفكّة

 

مرّة اشتريت برفان ما عجبهاش

كبّته كله ورفضت إني أستعمله

 

على فكرة

هيَّ كمان بتحب عيلتي

ودايمًا كانت شايلة صورة

لكل واحد بتحبه

 

يا ترى هيَّ عاملة إيه دلوقت

حاسّة بالخوف!

قرفانة من ريحة عرق حد ما تعرفهوش!

متضايقة من الشوارع الجديدة!

لو وقفت على محل من المحلات اللي روحناها سوا

هتعجبها نفس الحاجة!

على العموم هيَّ معاها مفتاح الشقة

وانا مستنياها.

* (1984 ـ 2015).

شاهد أيضاً

مجدي عبد الرحيم

قصيدة لواحد كان عايش .. مجدي عبد الرحيم

جربت تنام زيي يوماتي بعد الساعة ما تدق.. ستة الصبح إن مرة حاولت ونمت فـ …

اترك رد

error: المحتوى محمي بموجب قوانين حماية الملكية الفكرية