بخاف ع الحلم مني .. مراد ناجح عزيز

مراد ناجح عزيز

 

قاللي مخنوق

قلتله من إيه؟ قاللي مش عارف

وبفكّر اقطع شراييني واموت واخلص م الدنيا

قلتله نفسك فـ إيه؟ قاللي مش عارف

أصلي انا كل مابحلم بحاجه

أبويا يجيبهالي

الأحلام بالنسبة لي يا صاحبي

زي خطوتين لآخر شارعنا

مش محتاجه مجهود

ولا زق فـ طابور

ولا سفر لبلاد تعطش وتجوع فيها

غربتي أوقات مفهاش لعبي

وريحة البرفان بعد الحمّام

مش عاجباني

ماغيّرتش جزمتي من أسبوع

وطيّارتي الورق ..

مفيش سما سايعاها

كان نفسي فـ لعبة جديدة

وابويا سافر بقاله يومين

وانا مش قادر أتحمّل غربتي من غيرها

قلتله زيّك تمام انا مخنوق ..

وبحلم بحاجات كتير زيّك برضه

بس الفرق ما بينّا ..

انت بتخاف الحلم يتأخر عليك

وانا بخاف ع الحلم منّي

أحسن يموت فـ اديّه وانا بحضنه

من شدّة فراقنا كتير

زي عصفور كان فـ السما طاير

وانت مستنيه يغنّي لما تحطّه فـ قفص

وتوهمه انها دنيا جميلة

ولإنه عاش الحريّة/ مات

ومقبلش يعيش وحيد ..

زيّك تمام.. زيّي تمام ..

مخنوق

شاهد أيضاً

محمد عادل

شوبان .. محمد عادل

  أستمع أحيانًا إلى موسيقى شوبان وأقول في نفسي: «كيف لرجل لم يشهد بشاعة الطاعون …

اترك رد

error: المحتوى محمي بموجب قوانين حماية الملكية الفكرية